Sab Kuch Galat

Agar mai samaaj hoon aur apni hi vyatha gaane ka prayatn karoon


Yeh bhi galat kiya hai maine
Woh bhi galat kiya hai maine
sab kuch galat kiya hai maine
jeevan galat jiya hai maine

ganga ki dhara se milkar
khud ko patit kiya hai maine

Upanishadon ki pavan vedi
Brahm vakya ki khari safedi
Nalanda se takshshila tak
dhoondh raha tha gyan ki reti
Kurukshetra ke maidano se
Varnashram ko jiya hai maine

Yeh bhi galat kiya hai maine
Woh bhi galat kya hai maine

Nari durga thi, nari kaali thi
Nari apni kalkatte wali thi
Nari mamta thi, nari shakti thi
Sadiyon ki paramparik bhakti thi
Anginat chitaon ki lapton mein
Nari ko arpit kiya hai maine

Yeh bhi galat kiya hai maine
Woh bhi galat kya hai maine

Baghon ke daant gina karte the
Lav Kush bade saja karte the
Nav prasoon ki kilkaari par
koti phool khila karte the
Aaj unhi chote maathon par
Bal majoor likha hain maine

Yeh bhi galat kiya hai maine
Woh bhi galat kya hai maine

Yunan, Misr, Ruma bhale mit gaye jahan se
Semaaon ke ghatne se log nahi mara karte the
Talwaron ki chaanv tale
Auron ne bhi aahutiyan di thin
Satya dharm ki raksha mei
Dadhichi ne asthiyan di thin
Aatataiyon ki hinsa ka
Maqool jawab hua karta tha
Par Aurangzeb ke dar ke karan
Bichua pehen liya tha maine

Yeh bhi galat kiya hai maine
Woh bhi galat kya hai maine

Shaam ko tum jab ghar aate ho
Sahi salamat dikh jaate ho
Visfoton ki parchayi tale
Fir ek naya jeevan paate ho
(Tab) Sathiyai aazaadi
Dohra deti hai guhar wahi
Mazhab ki chardiwari se
Is desh ko baant diya hai maine

Yeh bhi galat kiya hai maine
Woh bhi galat kya hai maine

Tum grahan karo, aur mai arpan
Tum paap karo, aur mai tarpan
Tere charnon mei jo guzra
Keh dete hain usko jeevan
(Arre) Tere Amritpan ki khatir
Vish ko grahan kiya hai maine

Yeh bhi galat kiya hai maine
Woh bhi galat kya hai maine

Roads Are Vectors - I

Kuch ek sadakein shaant swabhav ki hoti hain, aapke saath bina kisi badsalooki ke chalti hain, na zyada mudti hain aur na hi laqeer ki tarah seedhi hoti hain. Ghani chaanv wale pedon ki shaagirdagi karti hain, thode bahut pyaau bhi mil jaate hain inke saath. Par yeh sadakein choti hoti hain, kisi badi ghumaavdaar akkhaad sadak ka hissa hoti hain. Zindagi mei idhar udhar bikhare falsafe bhare lamhon ki tarah, jo kaafi sanjeeda aur khaamosh hote hain.

Well Done Kid

Bahut bahut mubarak ho, aaj mujhe swarth ka arth samajh aaya, aapki safalta se na jaane kyon athaah khushi mili. Aap jab jab aisa kuch kareinge, hum door baithe muskurayeinge, akele kahin khade hokar zor se hans padeinge, gungune coffee ke cup se kahienge - ise kehte hain aashaon pe khara utarna. Bravo ! Worldz a carpet tonight and I shall cheer your success.

Shiqast kha rahe hain.....maza aa raha hai

Kuch sochkar maine kahin kuch nirnay liye the, kuch baareekiyon ka khayal rakhkha tha aur kuch ko nazarnadaz kar diya tha. Aaj ek pal ke liye aisa laga mano, pairon tale zameen khisak gayi ho aur athah andheri khayi se woh nazarandaz bareekiyan bula rahi hon. Kitabon mei rakhe purane gulab ki pankhudiyan jaise choone se apni murjhahat ki taazgi kho deti hain, theek usi tarah dil-o-dimag ki sankri galiyon mei pade khayalat agar ched diye jayein toh woh apni gungunahat kho dete hain. Mujhe zindagi ek baar fir ehsaas dila rahi hai ki na koi chota bada tha aur na hi kabhi hoga, samay samay ki baat hai, hum aap jitni jaldi apni khushfehmiyon se nikal aayein utna achcha. Aaghat kam lagega